سمیع الدین افغانی

                                                         خوب

ما د  وړی  پادشاهی  خوب  لیدو
چه سرمی جګ کړه زه په جیل کی ومه
زه  د جیلونو او کمپونو مینځ  کی
د افغانانو  په  سر خیل کی  ومه

خوب کی دخپل وطن امیر ومه زه
په خپل ولس باندی  زهیر ومه  زه
وه  هر طرف  ته ټول  اباد کورونه
پکی ښایسته ښایسته د بڼ ګلونه
ښه راشه درشه او اخلاص می لیدو
زه  د قومونو  په  هر خیل کی  ومه
زه  دجیلونو او کمپونو  مینځ  کی
د افغانانو  په  سر خیل  کی  ومه

وطن ښایسته ښکلی اباد وه زما
د  ولسونو  اتحاد  وه  زما
د رنګینه  باغونو  جوړ وه  وطن
ښه په ښایسته وادیوموړوه وطن
چه سرمی جګ کړه دنیا بل شانی وه
د بی وسی ژوندون په سیل کی ومه
زه د جیلونو او کمپونو مینځ کی
د افغانانو په سر خیل کی ومه

څوک دخواږه خواخوږی ویر ته ناست وه
د  نا امید  ژوندون  تدبیر ته  ناست  وه
عجب  روزګار عجیب  خیالونه  وه  بد
د  ناروا  ښکاری   چمونه  وه  بد
ټول وه پردی پردی پردی ښکاریدل
دلا مذهب ښکاری په  ښکیل کی ومه
زه  د جیلونو او کمپونو  مینځ  کی
د  افغانانو  په  سر خیل  کی  ومه

د جوړ وطن نه ادیری جوړی وی
د  شهیدانو  تر تپی   ډکی  وی
ورانی جادی وران تعمیرونه وه ټول
زړونه ویشتلی پری داغونه وه ټول
د خوږ ژوندون اخرنی شیبی وی
د تدریجی مرګی په ټیل کی ومه
زه  د جیلونو لاګرونو  مینځ   کی
د افغانانو  په  سر خیل  کی  ومه

د ځان  ځانیو  نه  نفاق جوړ وه
د مرګ او ژوبلی اتفاق جوړ وه
خلک وه خواره او مهاجر هر طرف
د  کور  او کلی  مسافر  هر  طرف
خوږ افغانی وطن مو وران کړخپله
د مرګنی  طوفان  په  ټیل کی  ومه
زه د جیلونو او کمپونو مینځ کی
د افغانانو  په  سر خیل کی  ومه
سمیع الدین افغانی